مش مكسوف من ربنا ؟؟

لما بتوعد صاحبك بحاجة ومابتوفيش بالوعد بتتكسف تشوفه..ولما تكرر الوعد ..وبرده ماتوفيش بيه بتبقى بتتمنى لو مشيت فى طريق ما يقابلكش من الإحراج .. شوف أنت ..وإنتى كام مرة وعدنا ربنا نتوب ..وبنرجع تانى ..كام مرة قلت يارب أنا عارف انى عصيتك وندمان وخلاص مش هعود للذنب تانى و.. يمررررر الوقت .. وتتكرر نفس المعصية ..مش مكسوف من ربنا؟ بتعاهده وتوعده وتخون العهد ومابتتحرجش انك ترفع ايدك وتدعيله..بتعصاه وانت عايش بين أرضه وسماه .. ولما تفكر تتوب ..شوية وقت وترجع تانى للذنب .. تفتكر ليه ؟؟ تعرفى ليه؟؟

ماكانتش التوبة صادقة

طول الوقت شباب تعمل ايه؟؟ يا إما بيصلوش أصلا ولا بيركعوها .. يا بيصلو متقطع وده يا إما حاسين انهم محتاجين ربنا اوى يوفقهم فى حاجة معينة فتلاقى الانتظام فى الصلاه لحد ما الحاجة دى تقضى وبعدها يرجعو لحالة السهو.. يا إما بيصلو بإنتظام ..

وخد بالك من اللى جاى ده أوى

الفئة اللى لما تقعد معاها تلاقيها ما بتفوتش فرض وكمان تتكلم عن الله ورسوله (عليه الصلاة وأفضل السلام ) وتلاقيهم عارفين اوى ان ده ذنب وده خطيئة وده حسنة .. حاجة تفرح القلب .. وفى نفس التوقيت ده.. نفس الفئة دى تلاقيهم واحد حاطط الإم بى ثرى فى ودانه على طول يا اما مشغل أغانى طول الوقت فى العربية أو فى شغله ..ماهو صلى بئى ..كأن الصلاة دى عادة يومية روتينية خلصها يبقى يعمل بئى اللى هو عايزة بدال خلص الفرض اللى عليه .. وبعد صلاة العصر يحكى فى التليفون او الموبايل مع بنات (صحباته!) ومع إنى مابستوعبش كلمة صحوبيه بين ولد وبنت بس هو اللى بيحصل إنه بيقول .. صحبتى أو ... أو ... أنتو عارفين طبعا الوصف اللى بيتوصف بيه العلاقه

استنووو بس

خلص الدوام بتاعه وخلصنا شغلنا ومشينا خلاص يأذن المغرب.. ماشاء الله عليه مابيفوتش فرض

وبعد المغرب يتشيك كدة ويروح يقابل بنت (مافيش اى صلة شرعية بينهم ) .. وهاى هاى .. والموضوع يتطور من الهمس للمس .. يا خبرررررر .. شايف معايا .. شايفه المشهد .. لمس إمرأة لا تحل له .. وهو عارف انها لا تحل .. وعارف انه مش هيتزوجها .. وتكلمه يقولك ( خليك بيييس يا مان ) تقوله : إسلامك بيقولك تعمل كدة ؟ يقولك بص لنفسك انت الأول .. ويجادل .. وهو يعرف كويس الحديث الشريف (لأن يطعن فى رأس أحدكم بمخيط من حديد خيرًُ له من أن يمس إمرأة لا تحل له ) صدق رسولنا الكريم..يا حبيبى يا رسول الله .. بتحذر من انه يمس إمرأة .. ده دلوقتى مش بيمسها بس .. ده بيزنى ويفتخر ولعياذ بالله .. بيحس إنه كده راجل ..ولو افتكر السرير المحرم اللى جمعه بانسانه وهو بيصلى بيستغفر ويتوب لربنا .. وبعدها يقع فى نفس الذنب مع انسانة تانية ..طب اللى ما بيصلوش ومابيلتزموش بالفروض هنتكلم معاهم من أ - ب إسلام ودين .. إنما اللى يعرفوة وشكلا بيتقو الله.. إنما الجوهر شىء تانى خالص .. هيحصلهم ايه ..يعنى انت عارف انك بتعصى .. ومكمل !!

وإنتى..

حلو اوى البادى .. جميل مش كدة؟ وظريف اوى لما يبقى ريحتك حلوة ..ده حتى البرفان انتى حطاه عشان صحباتك البنات لما يسلمو عليكى ..ده على أساس إن الرجالة من كوكب أخر ما بيعدوش من جمبك خالص .. وياسلام على قصر الطرحة وشياكتها وهى ملفوفة على الشعر لورا (إسبانيش) والرقبه باينة ..طب لبساه ليه يا بنتى ..؟؟!! ((محجبة )) الحجاب اللى هو من الحجب يعنى الستر .. هو ده الستر ؟؟؟.. ده انتى كشفتى أكتر ماسترتى وفضحتى أكتر ما خبيتى .. شوفى زنيتى مع كام راجل؟

إتخضيتـــــــى ؟؟

أيوة زنيتى بسسسس لمجرد إنك حاطة البرفان ده..وعشان لابسة كدة ..نعم ؟؟ مين إنتى ؟؟ عايزة تكونى إيه ؟؟ (بنت روشه وإستايل ؟؟) ماكنش روشة ده موجود ايام الرسول عليه الصلاة والسلام .. وممكن نكون إستايل وشيك بس باحترام شوية .. بلاش نلون جسمنا بلون القماش.. ماتشيليش غلافك من عليكى .. خلى الحياء غلافك ..زى الفاكهة المتغطيه الكل يتلهف عليها .. الكل يحلم بيها .. ويتمنى يوصلها وأما يوصلها هيصونها.. انما الفاكهة اللى فى الشارع ملونة وحلوة بس متعريه ماعليهاش غطا.. بتتلوث وحشرات بتطولها لحد ماتبوظ طعمها ولا يبقى لها قيمة ولا تمن .

أد إيه حزنت من قصة الشاب اللى دخل عليه أهله ..كان قاعد قدام الكمبيوتر وماردش عليهم ..قربو من الجهاز ومنه ..لقوه ميت ...والله لقوه ميت... وقدامه فيلم إباحى كان مشغله .. ربنا قبض روحه فى الوضع ده .. وهيـُبعث يوم القيامة فى الوضع ده .. أنا بكيت بإنهيار .. ليه مش بنخاف من ربنا ؟؟؟ بنخاف؟؟ لو خفناه ماعصيناه .. طب مش مكسوفين وإحنا ربنا شايفنا فى الوضع ده ليه ؟؟ ليه مغيبين ؟؟ وإنت إن كان إسلامك صحيح وفُتنت ..ليه ماتوبش بئى ؟ حلوة المعصية ؟؟ بتحس بلذة ومتعه أوى كدة ؟؟

ماتيجو نتوب الى الله .. هو غفور تواب رحيم .. يقبل التوبة ويعفو عن السيئات.. بس نتوب بجد ..بالنية والفعل .. بالعزم على عدم العودة للمعصية .. وأنا قبلكو .. مين مننا ملاك .. كلنا بشر وكل ابن أدم خطاء ..كلنا بنغلط .. بس ياريت نفوق .. لأن ربنا سبحانه وتعالى قال (فاذا جاء أجلهم لا يستأخرون ساعة ولا يستقدمون)..مانضمنش نعيش لبكرة ولا للحظة واحدة ..أنا نفسى ما أضمنش أخلص كتابة السطر اللى بكتبه ده .. تعالو نخجل من الله .. ونستحى فإن لكل دين خٌلق وخـُلق الإسلام الحياء.. ماحدش معصوم من الخطأ..مين فينا مابيسمعش أغانى ؟ مين فينا الموبايل بتاعه ماعليهوش كمية موسيقى أكتر من الأدعية؟؟ مين فينا فكر يحفظ القرآن الكريم كاملا وما يكتفيش بقصار السور؟ مين فينا ما قالش يارب خلاص دى اخر مرة وهتوب وفـُتن ورجع تانى يعصى .. تعالو نغتسل من الذنوب بالتوبة ..

يالله قوم نصلى ركعتين لله وندعى يتوب علينا توبة نصوحة

يالله إخلص التوبة المرة دى .. ربنا شديد العقاب لكنه برده هو الغفور الرحيم

تعالو نفوز بالمغفرة ..

وإنتى ... بلاش البادى الضيق والبرفان

خليكى الفاكهة الحلال وبلاش تغرى أدم بأكل التفاحة المحرمة

ويالله جربى تطولى الطرحة شوية

قولى يارب نفسى أتوب ساعدنى

وبصى للسما وأدعى وكفاية بص فى المرايه

ربنا بيغفر وبيسامح بلاش نسوف التوبة ونقول مسيرنا هنتوب .. ماتقوليش لما اتجوز هبقى البس واسع وابطل اعرف شباب . وماتقولش لما أتجوز ربنا هيهدينى ومش هعرف بنات وهلتزم .. ومش هزنى لأن زوجتى هتعفنى .. مين يضمن يعيش لبكره ؟؟ مين يضمن ؟؟ ولو عشت لبكرة وإنت على المعصية وربنا رزقك بزوجة ؟؟ تفتكر هيكتبلك زوجة بنت ناس طيبين تصونك ؟؟ هتعصيه وهيكتبلك الفرحة ؟؟ { الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ ...} ..توب عشان ربنا يرزقك بزوجة صالحة وتفرح بيها بدال ما تلاقى أمورك أتعرقلت والدنيا باظت فجأة .. وإنتى توبى وإدعى ربنا بإخلاص يثبتك وربنا بإذن الله هيغفر فهو القائل وقوله الحق (يا ابن آدم إنك ما دعوتني ورجوتني غفرت لك على ما كان فيك ولا أبالي، يا ابن آدم لو بلغت ذنوبك عنان السماء ثم استغفرتني غفرت لك ولا أبالي، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة) ..الله ..الله .. الله فعلا ليس كمثله شىء وهو السميع البصير ..

ربنا قريب اوى مننا ومنتظرنا .. المولى منتظرنا وهو الغنيّ عنا ونحن الفقراء إليه.. يفرح بعودتنا اليه .. ماتقولش معقول ربنا هيغفرلى كل اللى عملته.. إن شاء الله أيوة هيغفره إن أخلصت إنت التوبة ورددت المظالم من عرض او مال لأصحابها ..(‏الله أفرح بتوبة عبده من رجل نزل منزلا وبه مهلكة ومعه راحلته عليها طعامه وشرابه فوضع رأسه فنام نومة فاستيقظ وقد ذهبت راحلته حتى إذا اشتد عليه الحر والعطش أو ما شاء الله قال أرجع إلى مكاني فرجع فنام نومة ثم رفع رأسه فإذا راحلته عنده ‏)

مفيش وقت .. يالله نتوب ..إذا كان كل حاجة بندفع تمنها عشان نوصلها ..مابالك رضا ربنا وجناته .. الجنة تمنها غالى عليك ؟؟ هتوب وتخلص النية وتحافظ على الفرائض ده كتير مقابل الجنة ؟؟ قرب قلبك من ربنا .. قرب من كتابه ..هتحس بالخشوع ..وتفهم أياته هتستحى من المعصية وهتكسف أوى من نفسك (أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ* اعْلَمُوا أَنَّ اللَّهَ يُحْيِي الأَرْضَ بَعْدَ مَوْتِهَا قَدْ بَيَّنَّا لَكُمُ الآيَاتِ لَعَلَّكُمْ تَعْقِلُونَ). صدق الله العظيم

يا ربِّ قد آن لنا أن تخشع قلوبنا، وآن لنا أن نتوب.. نقف ببابك.. نرجو رحمتك وعفوك.. نتشرف أنا عبادك.. يا حليم.. يا غفار.. يا أرحم الراحمين..أوصيكم وإياى بتقوى الله وطاعته وأدعو الله لى ولكم بالرحمة والمغفرة وحسن الخاتمه .

السلام عليكم ورحمة الله وبركاته

الحمد لله، نحمده ونستعينه ونستهديه ونستغفره، ونعوذ بالله تعالى من شرور أنفسنا ومن سيئات أعمالنا، من يهده الله فلا مضل له ومن يضلل فلن تجد له ولياً مرشداً، وأشهد أن لا إله إلا الله وحده لا شريك له، خصنا بخير كتاب أنزل، وأكرمنا بخير نبي أرسل، وأتم علينا النعمة بأعظم منهاج شرع، منهاج الإسلام، (اليوم أكملت لكم دينكم وأتممت عليكم نعمتي ورضيت لكم الإسلام دينا)، وجعلنا بهذا الإسلام أمة وسطا لنكون شهداء على الناس ويكون الرسول علينا شهيدا، وأشهد أن سيدنا وإمامنا وأسوتنا وحبيبنا ومعلمنا وقائد دربنا محمداً عبد الله ورسوله أرسله ربه بالهدى ودين الحق بشيراً ونذيراً وداعياً إلى الله بإذنه وسراجاً منيراً، فعلّم به الأمة من جهالة، وهداها من ضلالة وبصرهم من عمى، وأخرجهم من الظلمات إلى النور بإذن ربهم إلى صراط العزيز الحميد، اللهم صلي وسلم وبارك على هذا الرسول الكريم، وعلى آله وصحابته، وأحينا اللهم على سنته، وأمتنا على ملته، واحشرنا في زمرته مع الذين أنعمت عليهم من النبيين والصديقين والشهداء والصالحين وحسن أولئك رفيقا، أما بعد،،،،

أحبائى فى الله .. أحمد الله الذى هدانى لعمل هذه المدونه وأدعو لمن ألهمنى أن أجتهد فيها دعاءا بظهر الغيب أن يصلح الله له حاله وأن ينير بصيرته وأن يرزقه الصلاح والفلاح فى كل أموره..وكما ذكرت هو مجرد إجتهاد من باب ((الدين النصيحه)) ولست أنا أفضل منكم ولا أزكى نفسى على الله وإنما أسأله تعالى دائماً الثبات وحسن الخاتمة..وأدعو الله أن يغفر لى بهذا العمل ذنوبى وأن ينقنى من الذنب كما ينقى الثوب الأبيض من الدنس..وأسأله أن يمن علينا بعفوه ويـُنزل علينا السكينة ويُحفنا بالملائكة

وأختم قولى هذا بأن أسأل الله تبارك وتعالى أن يهيئ لنا من أمرنا رشدا، اللهم اجعل يومنا خيراً من أمسنا واجعل غدنا خيراً من يومنا، وأحسن عاقبتنا في الأمور كلها، وأجرنا من خزي الدنيا وعذاب الآخرة، اللهم كن معنا ولا تكن علينا، وأعنا ولا تعن علينا، وانصرنا ولا تنصر علينا، وامكر لنا ولا تمكر علينا، واهدنا ويسر الهدى إلينا..اللهم إن حبيبك المصطفى بشرنا بـ (أن خير الخطائين التوابين) وأنا أعترفت بخطئى وأبوء بنعمتك عليّ فأغفر لى إنه لا يغفر الذنوب إلا أنت.وصلى اللهم وسلم وبارك على سيدنا ومولانا وحبيبنا وشفيعنا محمد وعلى آل بيته وأصحابه أجمعين والتابعين له بإحسان إلى يوم الدين ؛ اللهم لك الحمد حمداً كثيراً طيباً مباركاً حتى ترضى وإذا رضيت وبعد الرضا..اللهم لك الحمد حمداً كثيراً طيباً مباركاً بعدد ماكان وبعدد مايكون وبعدد الحركات والسكون ؛ اللهم لك الحمد حمداً كثيراً طيباً مباركاً كما ينبغى أن يكون الحمد ياربى لجلال وجهك ولعظيم سلطانك؛ سبحان الله وبحمده..سبحان الله العظيم وأشهد أن لا إله إلا هو الله الواحد الأحد القادر الصمد الذى لم يلد ولم يولد ولم يكن له كفوا أحد إلى يوم الدين وأشهد أن سيدناً محمداً عبده ورسوله .

والسلام عليكم ورحمة الله وبركاته